Lewatle Uaputauka (9) okwa tokola opo a longife oumbidja ovo va kulupa opo a ninge eendjato dokuumbatela ngee ovanhu va landa oinima yavo.
Oproyeka yaye okwe i luka ‘A Better Bag’.
Okaana oko ke li ashike mondodo 3 kofikola yedina Daniel Joubert Combined School koMariental oka ti oke ya po nedilaadilo eli momafiku 25 Febuluali.
![](https://d4f7y6nbupj5z.cloudfront.net/wp-content/uploads/2024/03/girl3.jpg)
Okwa mona kutya ngee tava ka landa oinima natate waye ovanhu ohava lande eenailona opo va endife mo oinima yavo oyo va landa, ashike ohave ke di ekelashi, osho ta ti osha nyika oshiponga nai komudingonoko.
Ovanhu noho ohava hepeke oimaliwa mokulanda eenailona.
Okwa eta po nee ondunge yokuumbata oinima, osho a ti ngaho.
Ondungedilaadilo yaye okuyambula po oproyeka yaye nokwoongela oinyanyu yoikutu opo a ninge eendjato.
Uaputauka okwa ti ota dilaadila opo a longele kumwe neefikola moNamibia.
Oha landifa keshe ondjato koifilinga itanho opo a dule okuya komesho nondjodi yaye.
“Onda dilaadila kutya oshike itandi uya po noproyeka ei opo ndi xwepopeke ekako momudingonoko, nokuxwepopeka ondado? Eenailona ihadi tulwa nawa.
“Ohadi ekelwashi ashike, tadi kakeke omudingonoko.
Oda nyika oshiponga kovanhu, koimuna nokoimeno. Ovanhu noho natango ohava longifa oimaliwa inashi pumbiwa opo va lande eenailona,” Osho a ti ngaho.
Uaputauka natate waye, Taljaard, okwa li va ya keefitola oshikando shotete nondjato yaye oyo a ninga mOlomakaya, osho a ti ngaho.
Taljaard, oo ha vatele omonakadona noproyeka yaye, okwa ti okuudite nawa neenghono medina loshinima osho ta ningi.
“Osheetwapo lela shi wa, okwa li ndi udite nawa neenghono eshi nda mona kutya omonakadona wange okwa kula nokuna oshisho momudingonoko, nokuna omadilaadilo e na sha noshiwana ashishe,” Osho a ti ngaho.
Ovanhu vomomudingonoko okwa li va kumwa eshi va mona eendjato, nokwa li va hala okuuda kutya oda longwa moshike notave di lande peni.
“Eli edilaadilo liwa nola pumbwa okuyambididwa nokutwalwa keembinga adishe daNamibia,” Oshilyo shimwe shomomudingonoko Normin Lucas osho sha ti ngaho.
“Ondi udite nawa eshi okaana kokaadona keedula daye ka kufa onghatu opo kaamene omudingonoko. Natu mu yambidideni opo tu yambule po oindjemo yoshinima eshi,” Anna Tenda osho a ti ngaho. Uaputauka paife okwe lipyakidila neekambaina dokulonga ovanhu nghee ve na okuninga eendjato tava longifa oikutu yavo oyo ya kulupa.
Eendjato oda ningwa di lidule, she likolelela koinima oyo omunhu a landa ile a hala okukalanda.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!