Ounona ova pumbwa okulihonga kombinga yomilele

Oshinima osho kwa li sha popiwa kongudu yovanhu ovo ve li ominge nomashenge mOvenduka oshivike sha dja ko kombinga yokuhonga ehongo loixulo meefikola otashi dimbulukifa kutya shihapu osha pumbwa okuningwa opo ovanhu va dule okukala hava kundafana kombinga yoinima ya pamba omilele va manguluka nopoluheela.

Ongudu oyo i li ominge nomashenge ya kwatelwa komesho kuPendapala Nakathingo, okwa li ya Shangela omukanda koministili yehongo, omaunghulungu nomifyuululwakalo oshivike sha dja ko,tai pula oministili opo i xulife po okulonga ounona kombinga yoinima ya pamba omilele puhe na ediminino okudja kovadali vavo.

Nakathingo oo e hadi outondwe vati, ehe na etomeno lomapopyo aye, okwa ti omahangano ngaashi #BeFree Movement, la kwatelwa komesho komunyekadi mukulu Monica Geingos, otaa xwaxwameke oinima youshenge.

“Ondi na ouyelele kombinga yomufindahongo kutya #BeFree okwa li a ninga oshoongaleleilonga moshitopolwahoololo shaMaheke, koGobabis, tashi longo kombinga yoinima ya pamba omilele,’ Osho a ti ngaho.

Oshike shapuka ngee ovanyasha tave lihongo nghee olutu hali longo? Oukadona novamati ova pumbwa okulongwa kombinga yeendodo adishe doundjolowele wavo, mwa kwatelwa oundjolowele wopaixulo nokumona ounona. Ouyelele ohau ya mbula po ovanhu, itau shunifa ounona pedu.

Eshi tashi kumwifa, omwaalu uhapu wovanambelewa vepangelo nosho yo oilyo yongudu tai pangele otava endulula eduko laNakathingo lapuka kombinga yehongo loinima ya pamba okuya moixulo.

Okwaanyene ounona va udifwe ko kombinga yoinima ya pamba okuya momilele, she likolelela komaitavelo oshikulu shonale, epuko lakula tali dulu okukala li na oilanduli yakula. Ounona ova pumbwa okushiiva osho shi li mondjila naasho shapuka nonghee ve na okumona omavatelo ngee ve a pumbwa.

Opa fa pe na eudeko lapuka kombinga yaasho hashi longwa ounona. Ovandjadjukununi ngaashi Nakathingo otava ti oshihongwa eshi ohashi yada ounona nouyelele inau dindwa nokau li nawa kombinga yoinima ya pamba omilele.

Hasho shi li ngaho. Paushili, omufindahongo wofikola owa longwa mo nawa opo u dule okuvatela ounona peedula da wapala naa po vakula nove na eudeko liwa.

Ounona ovo ve li meendodo dopetameko ove na oinima oyo hava dulu okuhongwa, ehongo oli na eendodo kutya pandodo ei ounona otava dulu okuuda nokulombwelwa shike.

Kakele nee kokukwashilipaleka kutya ounona ove na ouyelele u li mondjila va dule okuninga omatokolo, ondodo younona vofikola tava ningi omateelelo oya ya pombada neenghono moNamibia.