Omukulunhuwiliki wehongo Sanet Steenkamp okwa ti okaana kamwe ngee oka ningi eteelelo osha kuma ovanhu vahapu.
Okwa popya ngaha eshi kwa li ta nyamukula kombinga younona vofikola ve li lwopo147 va ninga omateelelo koshitopolwahoololo shaZambezi oshikako shotete.
Steenkamp okwa ti kumwa komateelelo e li 147 oo kwa li a lopotwa moshitopolwahoololo moshikako ashike shotete.
Omwaalu wopashitopolwa owa ulika kutya okaana aka kashona komwaava va ninga omateelelo oke na eedula 14.
Steenkamp okwa ti omateelelo ohaa denge nai ehongo lounona voukadona.
“Ehongo lokaana kokakadona keshe oko ka ninga eteelelo ola tetwilwa, shaashi oshi li po nale, kutya oshinakuwanifa shaye ohashi nigi okaana kaye. Eshi ohashi twala ashike oluhepo pombada lounona vetu, shaashi ohashi kala shidjuu kuvo, va alukile kofikola.
“Ongeenge ashike ovadali vakwatelwa mo lela notava yambidida, okaana opo taka dulu okwaalukila kofikola. Oibofa ei i li 147 yomateelelo ounona vofikola koshitopolwahoolo shaZambezi itaa limbilike ashike omunhu umwe, shaashi oku li oupyakadi wopashiwana,” Osho a ti ngaho.
Pokati komudo 2021 nomudo 2023, oshilongo okwa li sha didilika omateelelo ounona vofikola ve li 7 454. Oshikumungu eshi osha pumbwa omikalo da yooloka, Steenkamp osho a ti ngaho.
“Oshinima shikumwifa, shaashi omivalu edi itadi tu kumwe naado domafulo koupangelo vashona odo da dja koipangelo yakula, eemwaalu detu odi li pombada,” Osho a ti ngaho. Okwa ti osha ninga ngaa nee efimbo la wapala opo ovadali novaleli vopamufyuululwakalo va tameke okukala ve na eenghundafana doiholekwa nounona voukadona ngaashi kombinga youndjolowele womafimbo nomateelelo.
Momapekapeko oundjolowele womafimbo nosho yo oukoshoki oo kwa li a nyanyangidwa momudo 2022, okwa li sha monika kutya eepelesenda 30 doukadona inadi pewa omahongo kombinga yomafimbo fiyo da tameka okwaamona, shaashi ovadali novatekuli vavo inava kundafana oinima yoludi eli navo.
“Ngee okaana kokakadona kake na eshi keshi kombinga yomafimbo, nena itava shiiva oidjemo yokuya momilele inadi amenwa. Natango otwa mona kutya opu na ekwatafano lihapu pokati kokuhena eshiivo nomapunda.
“Natango vali, otwa mona kutya ounona vahapu ohava tameke okuya moixulo omanga inava wanifa eedula 14, ashike nee, opu na ovo kwa li va ninga oihakanwa yokuya moixulo shihe li pahalo lavo,” Osho a ti ngaho.
Steenkamp okwa ti oministili oye lipyakidila tai longo mo oilongifo yehongo younona ovo ve na oupyakadi wokumona ko nowopamadilaadilo.
Natango oministili oi li metifa lokuninga omakonakono oudjolowele meefikola opaunyuni.
“Otwa ninga eenghendabala dihapu moule weedula 10 da pita. Otu na elyenge letu lopaumwene lomapekapeko oundjolowele meefikola olo twa tameka noUniversity of Namibia.
“Otu na yoo natango eepolohalama domapukululo neengeleka novaleli vopamufyuululwakalo dokunghonopaleka eyandjo lomauyelele peefikola opo va ude ko kutya oshike naana lela hatu kendabala okuninga.
“Natango vali, otwa nghonopaleka omilandu detu dopeefikola dokutumina okaana oko ka pumbwa evatelo opo taka dulu okulimona meendelelo. Otwa nghonopaleka yoo vali owino wovahongi voshilongwa shoLife Skills,” Osho a ti ngaho.
Omupeduwiliki wehongo koshitopolwahoololo shaZambezi Norah Munembo pefimbo leenghundafana dehongo oshivike shinya sha landulwa kwaashi sha dja ko okwa koleka kutya ondodo yokuninga omateelelo oya ya pombada moshitopolwahoololo.
Omwaalu wounona va ninga omateelelo ve fike po77 okwa li wa didilikwa odula ya dja ko, oo wa fikama paife po147 moshikako shotete. “Oibofa ei oihapu unene sha pitilila moshikako shimwe. Okukala ovadali itava wilike ounona vavo osho shimwe shomwaayo tai eta oupyakadi ou, shaashi ounona ova manguluka unene okuninga keshe shimwe, ngaashi oinima yeehombo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
