Ounona vofikola onghee ngaa tava twikile nokutumwa komaumbo molwoupyakadi womeva peefikola koRundu

Eetundi kofikola yedina Ndama Junior Primary School koRundu okwa li da kalekwa manga Etitatu fiyo efimbo olo opo tali ka shiivifwa molwomumbwe yomeva.

Oshinima eshi osha kuma ounona vofikola ve dulife po1 300 nosho yo ovanailonga ve li 37 pofikola opo, shoo natango oshe ya eshi eefikola dimwe di li nhee dokoRundu nado dihe na omeva natango oule woivike.

Ofikola yedina Ndama Junior Primary School, oyo ya kala ihe na omeva oule woivike i li inhe ya pita paife, osha kala shidjuu neenghono, omukulunhuwiliki wehongo koshitopolwahoololo shaKavango Ushilo Christine Shilima osho a ti ngaho Etitatu.

Eshi otashi dulu okweeta oupyakadi wakula wopaundjolowele kounona vofikola nosho yo kovanailonga, ovo va kala nokufininikwa ve livatelele poluheela shaashi oundjuwo ova hada.

Shikwao vali, elambo lonyata inali kala nokutapwa.

The Namibia okwa li a lopota petameko loshivike eshi kutya ounona ve dulife po1 400, novahongifikola ve li 50 novanailonga ve li 30 kofikola yedina IK Tjimuhiva Combined School moshitopolwahoololo shaMusati navo ova kala vehe na omeva okunwa, okukosha oundjuwo nokulikosha.

Eshi osha etwa eshi omboolola yofikola ya teka konima yoivike itatu ya pita.

Paife, onghalo ye lifa oyo ya taalelwa kounona vofikola koRundu, oko Shilima ta ti eetundi oda kalekwa konima kwa konakonwa onghalo youndjuwo.

Ounona vofikola novahongifikola otava ka shiivifilwa kutya eetundi otadi tameke naini ngee kwa potokononwa oupyakadi ou, osho a weda po ngaho.

“Ohatu kendabala osho hatu dulu okuninga nomilandu depangelo opo tu mone omunhu a pombe mo onyata melambo lonyata moule wefimbo lixupi opo tu manife oshinima eshi.”

Omuhongi wondodo 2 pofikola opo, Nzimbu Phillip, okwa ti omumbwe yomeva oya kuma elihongo lounona.

“Dilaadila, ofikola otai pate paife. Efimbo olo tu na okudja paife fiyo opexulilo laNovemba olixupi neenghono. Oitopolwa imwe itai ka dula okulongwa molwoupyakadi ou, onghee nee otashi kumwifa kombinga yehongo lounona vetu,” Osho a ti ngaho.

Momafiku 23 Juli, ewilikongudu lodoolopa yaRundu okwa li la tula kumwe olopota, ya monika koThe Namibian, kombinga yaasho sha monika po kombinga yomalambo onyata taa kunguluka nosho yo oundjuwo va fita molwoupyakadi womeva koKehemu Primary School.

Ofikola oi na ounona ve li 3 196 novanailonga ve li 84.

Ewilikongudu ola holola omalipulo kombinga yokutandaveleka omikifi tadi di momeva oo akaka taa di momalambo onyata.

Ewilikongudu lodoolopa ola ti oundjuwo aveshe ve li 21 nosho yo omapoto okushitamena aheyali kofikola oko itaa longo, mwa kwatelwa oundjuwo ve li vanhe vovahongifikola ovo va fita.

“Oundjuwo ovo itava longo ova fininika ounona opo va kale tave livatelele poluheela mofikola. Onyata italala noyakukuta okwa li ya monika mofikola. Omeva onyata okwa li a monika taa lotoka mofikola okudja koBoloka A moundjuwo aveshe voukadona novamati.”

Hamushangandjai wehangano lopashiwana lovahongifikola vaNamibia ledina Namibia National Teachers Union Loide Shaanika Etitatu okwa ti omaupyakadi oo e li keefikola keeshi ape.

Okwa ti oundjuwo ovakaka notava piyaaneke, nokwa denga omufindo kutya oundjolowele wounona novahongi inau piyaanekwa.

“Itashi shi shiva natango tu landule omilandu dokukandula po omaupyakadi okudja momudo 2020,” Shaanika osho a ti ngaho.

“Itatu popile omulandu wepangelo moministili yehongo,” Shaanika osho a ti ngaho.