Ovakulunhu vokomisi yomahoololo ova lombwelwa va fiye po oilonga

Eengundu dopolitika nosho yo ovandjadjukununi otava pula ovanambelewa vakula vokomisi yomahoololo yaNamibia yedina Electoral Commission of Namibia (ECN) opo va xulife po oilonga konima yomahoololo a dundakana Etitatu.

Omahoololo okwa a danenwa keembapila dokuhoolola inadi wana, okuyeulula enhele domahoololo kwasha unene nosho yo omikweyo diledile.
Peenhele dimwe ovahoololi okwa li va kala momikweyo oule weevili 12.

Molwoinima ei ya puka, Ovanamibia vahapu okwa li va nyekwa oufemba wavo wopaudemokoli wokuhoolola.

Oinima ei oya eta omaupyakadi mokati koshiwana, neengudu dopolitika nosho yo novandjadjukununi.

“Aa oo ashike omahoololo kwa li ehe li nawa mondjokonona yaNamibia okonima yepangelo okatongotongo,” Omundjadjukununi woikwapolitika Rui Tyitende osho a ti ngaho.

“Pakutala komaupyakadi oo kwa li e li oshilongo ashishe peenhele dokuhoololela,omunhuota dulu nale okumona kutya eshi otashi ulike kutya kapu na owino washa,” Osho a ti ngaho.

“Elelo lokomisi yomahoololo ola lombwela oshiwana kutya okwa li ve lilongekidila omahoololo, ashike onghalo itai shi ulike.

Ova fa ashike oinima ve i longekida oshivike eshi ile va kufa omukalao ou kepangelo laZimbabwe ile laNorth Korea.

“Ngee ove na oukwashili, nava fiye po oilonga meendelelo ndee tava yandje ombili koshiwana eshi va teya oufemba wekotamhango wOvanamibia vahapu ovo kwa li inava dula okuhoolola.

“Ngee inava fiya po oilonga, nava tewaatewe moilonga,” Tyitende osho a ti ngaho.

Omunambelewa yokomisi yomahoololo wopashitopolwa Elizabeth Visagie Etine okwa ti kakwa li nande e na eshiivo kombinga yomalundilo oo.

‘Ino pula nge oinima oyo. Kombinga yoshinima osho, dengela ashike ombelewa yakula. Inandi uda oinima i li ngaho,” Osho a ti ngaho.

‘OKUTUKA OUDEMOKOLI’

Omupopiliko wongudu yoIndependent Patriots for Change (IPC) Imms Nashinge okwa ti okomisi yomahoololo oya tuka oudemokoli nosho yo eendunge dOvanamibia aveshe.

“Katus hi ngee ovanhu ava okwa li ngaa ve lilongekida, ile aishe okwa ashike ya ningilwa owina opo kuhandukifwe omwaalu uhapu wOvanamibia ovo kwa li va holoka. Ovanamibia ove ve hole shili oshilongo eshi noudemokoli nave lilongekide kutya oshinima eshi itashi tambulwa ko,” Osho a ti ngaho.

Omapopyo aa okwa li a endululwa komundjadjukununi woikwapolitika Ndumba Kamwanyah.

“Ova dopeka Ovanamibia, nande ngaa okwa li va kwashilipaleka kutya ove lilongekida,” Osho a ti ngaho.

“Omadidiliko opo a kala okudja ngaa pokuninga eembapila domahoololo, mwa kwatelwa nehoololo lavo lomulandu wokukonga oipumbiwa.

“Nava fatulule kutya eenhele dokuhoololela oda ka kala dihe na eembapila domahoololo da wana ngahelipi. Oupyakadi okwa li wa shike?

“Oshinima eshi oshi na oilanduli yakula neenghono koudemokoli wetu nosho yo komulandu wetu womahoololo kombinga yokulonga nawa.

Otashi nyanauna omulandu wetu woudemokoli.

“Ohandi popile kutya nava fie po oilonga, shaashi ova dopeka oshilongo shetu noudemokoli wetu. Ngee oupyakadi owakula unene ile itau dulu okukelelwa, nena omahoololo naa ningululwe ngee otashi shiva.”

Omupopiliko wongudu yoLandless People’s Movement Lifalaza Shimataa Etine okwa ti omahoololo okwa piyaanekwa shaashi okomisi yomahoololo oya kufa ashike omulongi weembapila domahoololo inai ninga manga omapulaapulo neengudu dopolitika.

“odula yadja ko,okomisi yomahoololo okwa li ya pitika Swapo opo a longife oushina vavo vomahoololo ndee tava kana.

Ndee ta peya vali oshinima sheekompiuta dopeke davo odo kwa li puhe shiivike apa da ya.

“Pefimbo lomahoololo aa, okwa li tava yandje oukalata vomahoololo inava popya neengudu dopapolitika nosho yo ovakufimbinga vakwao. Neudo otwa li tu na oshikumungu shokukonga oipumbiwa,” Osho a ti ngaho.

Okwa ti okomisi yomahoololo oya udaneka omulandu womahoololo u li poluheela ashike eudaneko e li okomisi oya dopa okuliwanifa po.

“Ndee okutungila kwaasho, otu na eemata donghela. Efiku li i unene kudemokoli wetu atushe.

Oinima aishe ei ya tulwa kumwe osho twa itavelela kutya okomisi yomahoololo oya dopa mokukwashipaleka kutya omahoololo aa okwamanguluka noku li pauyuki,” Osho a t ngaho.

Simataa okwa ti okomisi yomahoololo itai dulu okukalela po oinima ya fimana.

“Ewilikongudu lopombada nal fiye po oilonga. Otava monika va fa tava dopa unene mukeshe shimwe, nande onedopo eli, kapu na elongolopauyelele ile okukalela po oinima,” Osho a ti ngaho.