Pelesidente wehangano lovalihongi moNamibia, Benhard Kavau, okwa ti ehangano ola mona ouyelele okudja kovalihongi koshiputudilo shopombada shedina Triumphant College kutya ovahongi ova kala nokufaula keetundi.
Ashike nee, omupopiliko woshiputudilo, Kameny Lukas, okwa ti oshinima eshi kashi shi shoshili.
Eshi oshe ya konima eshi ovalihongi vokoshiputudilo eshi kOvenduka va nyenyeta komboinga yeetundi nokupopya novalihongi.
“Eshi otashi fiye ovalihongi vehe na ehongo olo va pumbwa ndee itashi tambulwa ko,” Kavau osho a ti ngaho.
Okwa ti ehangano itali popile nande ovahongi ovo itava i keetundi novahongi va tya ngaho nava kufwe eemhito doilonga.
“Itashi tambulwa ko ovalihongi tava futile ehongo ashike otava anyenwa eemhito dokulihonga molwaashike okuhena ko nasha kwovahongi.,” Osho a ti ngaho.
Ehangano otali pula opo eendjambi dovahongi ovo di ye moipumbiwa yovalihongi.
“Ohatu pula elelo loshiputudilo opo li kufe eenghatu da pumbiwa opo ovahongi aveshe va kale tava longo oilonga yavo nawanawa ngaashi tashi dulika.
“Otu li pamwe novalihongi vakwetu hatu pula ehongo li na ongushu ngaashi tashi dulika, ndee itatu fuda po nande fiyo eshi sha ningwa,” Kavau osho a ti ngaho.
Lukas oshivike eshi okwa koleka kutya ovalihongi vamwe ova ti inava kala nande tava hongwa sha wana.
“Otwa hala tu ku udanekele kutya oshinima eshi otwe shi kufa ko lela twe lipaka mo notwe litula mo mokuyandja ehongo neyambidido longushu kovalihongi vetu.
“Ashike nee, oshinima osho tashi popiwa kovalihongi kutya ovahongi itava i keetundi kashi shi shoshili.
“Oilongwa aishe moshiputudilo oi na ovahongi ve litula mo ovo ve na oshinakuwanifa shokuhonga nokuyambidida ovalihongi mondjila yelihongo lavo,” Osho a ti ngaho.
Lukas natango okwa twa ovahongwa omukumo opo va longife omikalo domondjila domakwatafano opo eemumbwe davo di ungaungwe nado.
Okwa ti itaku ka ningwa nande ekonaakono omwedi ou.
“Elelo letu lelihongo ola tokola opo li yandje omhito yokunyolulula ekonaakono lutatu.
“Mokati kavo omu na ovalihongi va keshe fiku, ovalihongi ovo have ya ashike omalufe novalihongi ovo ihave ya nandenande ovo va lundila oshiputudilo kutya inashi lipaka mo meemumbwe dehongo lavo,” Osho a ti ngaho.
Omulihongi umwe oo he lihongele keumbo, oo ina hala nande ouyelele waye wa holoka, okwa ti okwa pewa oihongwa ya puka nokwa kala tai keetundi nota ningi oipewalonga ya puka.
Eshi okwa li sha wapalekwa, ashike osha fiya omuhongwa ta longo noudju mokuwanifa po oipewalonga moulefimbo oo a pewa.
“Onda shanga notsutya efiku limwe ashike olo nda pewa oshilongwa shi li mondjila, inandi lilongekida nawa,” Osho a ti ngaho.
Omulihongi umwe okwa ti oudjuu umwe vali ve na, ekwatafano inali wana pokati novalihongi ovo have lihongele komaumbo novahongi vavo.
“Ohatu futu ofuto yofikola, ashike ohatu liumbatelwa twa fa hatu fikola oshali.
“Keshe efimbo ohatu kongo ouyelele kombinga yoinima ya fimana ashike ohatu longo noudjuu okumona ouyelele wa wana,” Osho a ti ngaho.
Ovalihongi natango ova popya kutya ove na oudju kombinga yekonaakono lowina noudjuu welihongo lokomalungula moshiputudilo.
Elelo loshiputudilo otali shekwa shaashi ihali nyamukula nohali dopa okupotokonona omaudjuu ovalihongi.
“Otwa fiwa momilaula kombinga yoinima ya fimana, ngaashi omafiku ekonaakono nelunduluko loihongwa. Otashi lolola nai,” Omulihongi umwe osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
