Ounona ve dulife po1 400 kofikola IK Tjimuhiva Combined School, koshitopolwahoolo shaMusati ova tumwa komaumbo molwaomumbwe yomeva mofikola.
Ofikola ei oi li moshikandjohoololo shaRuacana, ohai longifa omeva omomboola oyo taku tiwa inai hala vali okulonga nawa.
Omukulunhuwiliki mouministili wehongo, ounghulungu nomifyuululwakalo, Sanet Steenkamp, okwa ti ouministili ou na ouyelele kombinga yomumbwe yomeva kofikola oko, ashike ouministeli wounamapya nounaimuna nomatendululo edu owe lipyakidila noshikumungu osho.
Okwa ti omumbwe yomeva oya udifa ouministili nai neenghono.
“Shi nasha novanafikola ava va tumwa komaumbo, omukulunhufikola oku na okuuya po nonghedabala imwe opo keshe ovili ya hepa i futilwe po,” Osho a ti ngaho.
Okwa ti omanga ounona va tumwa komaumbo, oku wete kutya ova pewa omambo va ka leshe.
Umwe womovanailonga vomofikola ou a popya noThe Namibian neudafano kutya oukwatya waye wopaumwene inau popiwa, shaashi ina efelwa okupopya noikundaneki, okwa ti omumbwe yomeva oya eta oupyakadi kombinga youkoshoki shaashi oundjuwo itava longo nawa vo otava di edimba li i neenghono.
Omunailonga okwa ti ofikola oya lombwela omukulunhuwiliki wehongo moshitopolwahoololo, Benny Eiseb, kombinga yonghalo ei, ashike ohava mono ashike omalipopilo keshe efimbo.
“Otwa lombwela ombelewa yomukulunhuwiliki, ashike ova kala ashike nokutupa omalipopilo keshe efimbo. Mu02 Febuluali, otwa tokola kutya kashi li nawa okukala twa kaleka ounona pofikola puhe na omeva. Otwe va tumina komaumbo.”
Odjo oya ti oboloka ashike imwe yomuhandjo i na omeva, ofikola aishe omo ya tala mu yo ashike omafimbo amwe omeva koboloka oko nako omeva ohaa kala itaa ende.
Eiseb okwa talele po ofikola mEtinano ndele ta pula kutya oshike ounona va tumwa komaumbo, ta ti okwa li va pumbwa okukala mofikola.
Okwa pula elelowiliki lofikola opo li ete ounona kofikola Oshoondaxa sha dja ko, osho sha anywa kovanailongo vofikola.
Okwa udaneka kutya ota tumu ovanawino kofikola oko efiku la landula, ashike okwa ka udulila komesho efiku olo kwa li ve na okufika, ta ti kutya okwa li ve li kOpuwo ekilomita di li 60 okudja pofikola opo.
Odjo oya ti fiyo Etivali ovanawino inava fika po natango pofikola.
“Otwa kumwa.”
Odjo oya ti Eiseb okwe va shololifa opo vaha lombwele nande oikundaneki kombinga yoshinima eshi.
Omukulunhufikola Filipus Linus, okwa tuma oThe Namibian kombelewa yaEiseb eshi kwa li a dengelwa opo a tye kosha Etivali.
Eiseb okwa lombwela oThe Namibia Etivali kutya ita dulu okutya ko sha koshikumungu, ota dulu ashike okutya ko sha mEtitatu (onghela). Osho tashi ningi oshinima shi djuu natango, odjo osho ya ti ngaho, omuhandjo ou hadi sha pitilila shaashi ou na ounona ve li 1 450 okudja pondodo yopetameko fiyo ondodo 11, nande okwa li ashike wa pumbwa okukala u na ounona ve li 700.
Omunambelewa umwe womofikola okwa ti eembete momuhandjo inadi wana nounona ovo vondodo yopetameko ohava longifa etalashe limwe ve li vatatu, omanga eenduda dimwe odo da pumbwa ashike okukala di na ounana 15, odi na ounona 32.
Omunambelewa okwa ti vali opu na vali omuhandjo wopokafimbo pofikola oo u na ounona ve li 70. Omunambelewa ou okwa ti ounona ava ohava longifa okandjuwo kamwe ihaka longo nawa noshilikoshelo shimwe.
“Ove na okupenduka lwopo04h00 va ka tale omeva, nokonima eshi ve likosha, ohava wapaleke omuhandjo omanga inava ya keetundi.”
Ofikola kai na ovawapaleki va wana, omunambelewa osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
