Ovanamibia ova kanifa oimaliwa i fike peemiliyona di li N$50.7 okupitila momakengelelo momudo 2024, oshimaliwa osho sha ya pombada neemiliyona N$4.7 okudja peemiliyona N$46 momudo 2023.
Omakengelelo aa ahapu okwa li a ningwa okupitila pamalungula, oo a kanififa oimaliwa i fike peemiliyona N$29.
Olopota yombaanga yaNamibia yokodula oya ti, omaponokelo aa luhapu ohaa ningwa okupitila peeiimaila, outumwalaka vopangodi, neengodi ile komapandja opamalungula oo haa monika a fa oshili.
“Omakanifo aa luhapu ohaa ningwa pamaponokelo opamalungula, omo ovanhu tava hekekwa va yandje omauyelele avo opaumwene ngaashi omadina oo haa longifa noipatululo yavo keembudi odo tadi ti oda dja komahangano omondjila,” Olopota osho ya ti ngaho.
Oshimaliwa shi fike peemiliyona N$19 pakulongifa oukalata okwa li sha kengelelwa, okudja peemiliyona N$18 domudo 2023.
Ombaanga yaNamibia oya ti, eyopombada eli okwa li la etwa unene pakulongifa omayakulo opamalungula ombaanga.
Oiningwanima ei ohai ningwa ngee ovayakulwa va longifa oukalata vavo pamayakulo opamalungula opo onomola yopaumwe hai tuminwa kongodi, sha hala kutya onomola oyo ohai pumbwa okukolekwa komuyakulwa.
Pakuweda po oimaliwa yopamalungula, mwa kwatelwa oimaliwa yokutuminwa keengodi (ewallets) nosho yo okufuta pamalungula, omakengelelo ayo okwa shu na pedu kashona.
“Oumbudi woimaliwa yopamalungula owa ya pedu fiyo opeemiliyona N$2.7 okudja peemiliyona N$11 domomudo 2023,” Olopota osho ya ti ngaho.
Ombaanga yaNamibia oya ti eshunopedu eli ola etwa komahongo ovayakulwa kombinga yovakengeleli tava denge eengodi.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
