Ovanamibia ve fike po25 okwa li va mangwa po moBrazil okudja momudo 2016 shi na sha nokuumbata oingangamwifi shihe li paveta.
Eshi osha kwatela mo ovakainhu ovo kwa li va pewa oshimaliwa shi fike poN$40 000 opo va pitife oingangafwifi okuya moilongo yaAmerica yokoumbuwanhu.
Omukulunhuwiliki womakwatafano opaiwana Penda Naanda okwa ti ovanhu vahapu ovo kwa li va mangwa po ovakulukadi.
“Okudja momudo 2016, omwaalu wovakwashiwana Ovanamibia va mangwa po moBrazil eshi tava kendabala okupitifa oingangamwifi ou li po25, ashike vahapu ovakainhu,” Osho a lombwela oThe Namibian ngaho.
Naanda okwa ti omwaalu ou tau i pombada wovanhu tava kendabala okupitifa oingangamwifi otashi dulika u ka kume nai omufika waNamibia wopaiwana.
“Ohatu kunghilile Ovanamibia kombinga yokupitifa oingangamwifi shihe li paveta, shaashi otashi dulika shi ke tu kanifife omikanda detu doshali dokuya moBrazil notashi ka nyanauna ekwatafano letu lopaiwana,” Osho a ti ngaho.
Ovapitifi voingangamwifi ova kala nokupona oingangamwifi opo va dule okupita nayo poupale veedila.
Omwedi wa dja ko, omupitifi woingangamwifi Omunamibia Paulina Mbangula (30) okwa li a mangwa po pokapale keedila kedina OR Tambo International airport moSouth Africa, konima eshi kwa li kwa didilikwa kutya oku na eepela dococaine di dulife po60 medimo laye.
Mbangula okwa li ta di koBrazil.
Oshibofa shaye osha eta eemata nghee Ovanamibia tava longifwa moinima ya pamba oingangamwifi.
Momudo 2016, omukainhu weedula 26 wOmunamibia okwa li vati a mangwa po moBrazil konima eshi a hangika e na ococaine yongushu yeemiliyona N$2.
Omukainhu, Mesia Antonius, okwa li a mangwa po pokapale keedila kedina Sao Paulo International Airport momafiku 09 Auguste.
INAVA HALA OKUYANDJA OMAUYELELE
Naanda okwa popya kutya Ovanamibia vahapu ovo va mangwa po ovaanya okupopya omauyelele avo opaumwene osho shi li oupyakadi wakula keenghedabala dombelewa yoshilongo. “Oupyakadi oyou kutya Ovamibia vahapu ovo hava umbata oingangamwifi paumbudi inava hala okuyandja omauyelele, shaashi ove na oumbada kutya ouyelele otau udika kovakwapata vavo, ovo vehe shi apa ve li,” Osho a ti ngaho.
“Ngee ombelewa yoshilongo ya lombwelwa kutya opu na Omunamibia a mangwa po, oi na oshinakuwanifa shokutalela po omunhu oo opo i kwashilipaleke kutya Ovanamibia otave liumbatelwa ngaa shi li pauyuki nomaufemba avo okwa fimanekwa.
“Natango oshi li oshinakuwanifa shoministili opo i lombwele ovakwapata kombinga yekwatopo lomukwapata wavo, ngee oshinima osho osha lopotwa koministili,” Osho a ti ngaho.
Okwa ti opu na omalongekido ape e li metifa okutuma ovanadolongo pokati kaNamibia naBrazil.
“Konima a manifwa, oveta otai endelelifa oshinima osho shokutumina ovanhu ovo va nyona koshilongo shavo eshi otashi ka ningwa nee pokati koilongo ei ivali.
Omanga eudafano tali ungaunga nomavatelo opambelewa ovakwashiwana ovo va mangwa po, itali ke va vatela nande noinima yopaveta,” Osho na ti ngaho.
OIMALIWA
Omukalelipo waNamibia mukulu koBrazil Samuel Nuuyoma okwa ti ovafeekelwa vahapu ovakainhu tava hekwa va pitife oingangamwifi va udanekelwa oimaliwa.
“Ohava i koukadona ndee tave va udanekele oimaliwa ihapu, N$40 000 fiyo N$80 000, opo va katale oinima oyo ndee vahapu ngee va udu omwaalu, ihave lipula vali nokuli,” Osho a lombwela oThe Namibian ngaho.
Nuuyoma okwa ti kashi fi ashike oukadona vaNamibia va taalela oupyakadi ou, oukadona okudja koilongo aishe.
“Omukalo owe lifa. Otava heke oukadona va ye momalweendo oinima aishe oya futwa nale,” Osho a ti ngaho.
Nuuyoma okwa weda po: “Onda li lela mekwatafano nOvanamibia ovo va li moupyakadi ou ndee handi va ningile omapulaapulo ndee handi kundafana noilongo ikwao.
“Osha kwatela mo ovalumenhu vahapu menenedu ovo tava heke oukadona ava unene ngaa ovo vawa nova kotoka,” Osho a ti ngaho.
Epangelo laBrazil ola ti oimbuluma ya kwatela mo Ovanamibia oi li pedu natango.
“Omwaalu woimbuluma ya kwatela mo Ovanamibia moBrazil natango ou li pedu neenghono, okuyelekanifa noilongo ikwao menenedu Africa.
Onghee nee, osha fimana opo oilongo aishe i longele kumwe opo i yambule po oveta keembinga adishe mbali i dule okukala i na ekwatafano lakola noi kelele oimbuluma i ye pombada,” Ombelewa yaBrazil osho ya ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
