Ovanaulema ve li lwopo21 700 ove lishangifa opo va dule okukahoolola momahoololo opashiwana oo twa taalela muNovemba.
Omukulunhu wokomisi yomahoololo yaNamibia yedina Electoral Commission of Namibia Peter Shaama Etine eshi okwe shi popya omanga kwa li ta shiivifa ouyelele kombinga yovahoololi mOvenduka.
Shaama okwa ti, ovahoololi ava ova kwatela mo ovanaulema ve li 16 128, ovanhu ve li 1 744 ihava uduko omatwi, ovapofi ve li 3 202 nosho yo ovanhu ve na eemati dopashinanena ve li 711.
Ovanhu vahapu ovo ve lishangifa va ka hoolole ovanyasha, shaashi eepelesenda di li 56 dovanhu ovo ve lishangifa va ka hoolole odo vanhu okudja peedula 18 fiyo 34.
“Ovanhu ovo va dalwa okudja momudo 1982 okuya pedu ve fike po 901 316 ove lishangifa va dule okuhoolola, nove li omwaalu uhapu wovahoololi vetu,” Shaama osho a ti ngaho.
Okomisi yomahoololo oya nyolifa ovanhu ve li 1 467 604 moshilongo ashishe nosho yo keembelewa doshilongo koilongo ikwao, omwaalu oo u lile po eepelesenda 91 dovanhu ovo va hanga okuhoolola.
Shaama okwa ti eepelesenda di li 46 dovanhu ovo ve lishangifa okuhoolola odo valumenhu, omanga eepelesenda 56 odovakainhu.
Ehangano lopashiwana lovanhu tava lumbu noulema ledina National Federation for Persons with Disabilities laNamibia, la kalelwa po kuMathew Hashoongo, ola pula eengudu adishe dopolitika di kwatele mo ovanhu ve na omaulema momisholondodo davo dovanhu ovo tava tuminwa kopaliamente.
“Manga emanguluko laNamibia inali uya, Ovanamibia ovalwa ongomunhu umwe, nolwoodi letu okwa li laaveshe. Konima yemanguluko, Namibia okwa li a shaina omaudafano ahapu kombinga yeameno lovanhu ve na oulema,” Osho a ti ngaho.
Hashoongo okwa ti oshilongo osha pumbwa okunghonopaleka omilandu da kwatela mo ovanhu aveshe, nekotamhango ola pumbwa okulundululwa opo kuhanaunwe po oinima oyo tai tongola nokwameka kwinya ovanhu ovo tava lumbu noulema.
Ovanhu ovo ve na oulema ova pumbwa okulikalela po voovene nova pumbwa okukala ve na emanguluko lokwiinyenga ngaashi va hala, lokukala opo va hala nosho yo okupangela eenghalamwenyo davo voovene.
“Otwa pumbwa eemhito tu ninge omatokolo,” Hashoongo osho a ti ngaho.
Okwa pula eengudu odo tadi kambaina di ye momutumba wopashiwana opo di kufe ko oshinima eshi shokukwatela mo ovanhu aveshe nelitulemo.
“Ohatu pula oilyo yetu i litule mo mopolitika shi na sha nokuxwepopaleka eenghalamwenyo dayo,” Hashoongo osho a ti ngaho.
Natango vali, omukwateli komesho woufemba womunhu wongudu yoLandless People’s Movement (LPM) Joyce Muzengua okwa pula omalutu okuninga omatokolo epangelo opo a kwashilipaleke kutya ovanyasha ova kwatelwa mo kutya nee otashi pula shike.
Okwa ti eengudu odo di na ovaleli vahapu vovanyasha otadi dulu okunana omawi ovanyasha ahapu, okuyelakanifa neengudu odo di na ‘ovakulupe’.
“Ongudu yoLPM oi na eepelesenda 60 dovanyasha ve li momusholodo wovanhu ovo tava i kopaliamente opo kukalelwe po nawa Ovanamibia vahapu,” Muzengua osho a ti ngaho.
Okwa ti ongudu oi ya di ovanyasha melelo layo.
Oshilyo shevava lovanysha loSwapo Willem Amutenya osha ti omwaalu wovanyasha ovo ve lishangifa oumbangi kutya ovanyasha vaNamibia ove na ko na sha nonakwiiwa.
“Ovanyasha ove na ohokwe yokukufa ombinga mokuninga omatokolo e na sha nonakwiiwa yavo,” Osho a ti ngaho.
Amutenya okwa ti okupopila ovanyasha kwopamuhanga kwa lundulula eudeko lavo kombinga yopolitika nokuhoolola.
“Eshi oshiwana shefindano! Eshi otashi ulike kwaame kutya omaindilo etu oo itaa talika nomahalo etu naa talike nawa. Onghee nee, omawi ovanyasha naa fimanekwe,” Osho a ti ngaho.
Ashike nande ongaho, okwa ti natango opu na oshinima shakula , sho osho nee okuhoolola kwovanyasha momafiku 27 Novemba 2024”.
Amutenya okwa pula ovanapolitika aveshe opo va kufe ombinga moikonga yomahoololo.
“Natu daneni onghandangala meengudu detu dopolitika, hatu wilikwa kelididimiko lopolitika, eudeko nosho yo oukumwe oo tau lalakanenwa kwaaveshe,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
