Ovanhu vahapu kOmbaye kakwa li va dula okulishangifa va kale hava mono evatelo loshimaliwa shaavo vehe na oilonga komwedi

Ovanhu omayovi kOmbaye , ova kala nokuteelela momikweyo opo ve lishangife va dule okukala hava mono evatelo loshimaliwa komwedi okudja kepangelo, ashike nee Etitano okwa li efiku laxuuninwa nokwa li va shunifwa ko.

Kamusela woshikandjoohoolola shoMbaye yokoushai Donatus Tegako okwa ti omalishangifo oshimaliwa shoministili yefikopamwe loukakwashikookanhu, okukufa po oluhepo nonghalonawa yopanghalafano kakwa li nande a fanekwa nawa., osho sha etela Ovanamibia ovo kwa li ve li momikweyo nokwa li nokuli tava kofele momikweyo odo diledile oule weevili va mone oixuna ihapu.

Okwa ti evatelo loshimaliwa ola tambulwa ko, ominitili okwa li ya pumbwa okupitika ovanhu ve lishangife oule wefimbo lawana.

Ovakalimo vomOmbaye omayovi ova kala ve li momikweyo komesho yeembelewa doshikandjohoololo shOmbaye yokoushai okudja ngaa momafiku 13 Novemba fiyo Etitano la dja ko, olo la li efiku laxuuninwa.

“Oshilengifa eshi hatu ungaunga nasho komunute waxuuninwa puhe na eenghono domunhu. Inashi longekidwa nawa.

Otwa tambula ko nokuyambidida evatelo loshimaliwa eli, ashike ola eta omakulukuto peembelewa detu.

“Ovanhu okwa li tava kofele momikweyo oule womafiku edulife pwaatatu inava mona evatelo.

Kashi li nawa okutuma ovanhu ve li vavali konhele yomalishangifo ngaashi kOmbaye opo va ka vatele ovanhu ve dulife po6 000.

Otashi udifa nai. Okwa li tu na oomeme ve li momateelelo, naavo ve na omaudu a piyaana novakulupe ve li momikweyo.

Omwaalu wovanhu owa holola kutya ovanhu vangapi tava mono oixuna moshilongo omu,” Tegako osho a ti ngaho.

Ovakalimo ovo kwa li va fikama momukweyo Etitano ova nyenyeta kutya efimbo lomalishangifo okwa li unene lixupi nokakwa li tava dulu okumona omikanda adishe odo kwa li da pumbiwa.

“Ovanhu vahapu okwa li va shunifwa ko nova ka waimina vali omukweyo konima va ninga omafiku apa. Fyee paife ohatu ningwa ngahelipi?” Conie Byjl osho a pula ngaho.

Omukalimo umwe, Jenny Caleb, okwa ti: “Otwa lotauka twa hala unene okulishangifa ndee efiku laxuuninwa okwa li li li popepi.

Otwa enda nokuli twa ya nokomakule ngaashi koNarraville, ashike omukweyo kakwa li tau ende. “Onda pumbwa okushangwa shaashi ihandi longo, ashike atushe otu na oumbada kutya itashi ka ningwa vali.”