Ovashingi vomahauto ve li lwopo148 000 ova taalela okumangwa po molwomahandukilo omeendjila

Opolifi yaNamibia oya ti ovashingi vomahauto ve fike lwopo148 000 ova taalela okumangwa po shi na sha nokuteya eemhango domeendjila da yooloka oshilongo ashishe eshi omatango manene a eta ko omayulu.

Komufala Petrus Swartz wokoshikondo shomeendjila Etine okwa ti oshinima eshi osha eta eengunga domahandukilo omeendjila di fike peemiliyona N$170.8 oshilongo ashishe.

Okwa londoda ovalongifi veendjila kutya ovanambelewa vomeendjila otava kongo ovanhu ovo va hanga okumangwa po pomainda omeendjila oshilongo ashishe shaashi omafiku avo okufuta outekekte vavo vomahandukilo aa pwa ko nokwa yandja omayele opo va ninge omapulo koshikondo shopolifi shomeendjila opo va mone ouyelele kombinga yeengunga davo omanga inava ya komafudo opo vehe ke lihange tava mangwa po.

“Ngee owa hangika mondjila ndee owa pumbwa okumangwa po, oto mangwa po, to twalwa komhangu ndee to pewa ehandukilo komhangu.”

Okwa ti kutya oitopolwahoololo ei i na ovanhu vahapu tava kongwa va mangwe po oKhomas, Otjozondjupa, Oshana, Omusati nErongo. Ashike nee, okwaanya okuyandja omwaalu keshe moshitopolwahoololo.

Oshivike shinya sha dile ko, opolifi yaShikoto okwa li ya pitifa omadina ovalongifi veendjila ovo va kayula onyanga meendjila okudja ngaa eedula nhatu da pita nove li tava kongwa paife shaashi ova dopa okufuta omahandukilo avo oshimaliwa oo kwa li va pewa.

Omukulunhu wopolifi moshitopolwahoololo shaShana komufala Naftal Sakaria oshivike sha djako okwa ti oshitopolwahoololo osha teelela okumona omwaalu uhapu wovanahu tava di koitopolwa ya yooloka moshilongo.

Okwa pula ovanambelwa opo va kale ve lilongekidila oilonga. Okwa ti opolifi itai ka kala ashike tai tumu ovanambelewa ashike noinima yopaungoba opo tai ka kala, unene ngaa koshikondo shomeendjika.

“Kamu na onhele yovalongi voimbuluma omu. Etitano, otwa manga po ongudu yeengangala omanga kwa li tai kendabala okuteya eumbo,” Sakaria osho a ti ngaho.

Ongangala imwe oya kala nale tai kongwa molwoibofa yokuteya omaumbo e li 12 oshilongo ashishe, nosho yo oshibofa shedipayo, osho a weda po ngaho. Okwa londoda eembudi odo hadi i koshitopolwahoololo shaShana nelalakano lokukavaka kutya ode litula moshiponga shokuninga oChristmas yado ixupi.
“Itatu ka danauka.”

Komufala wopolifi koshitopolwahoololo shaMusati Ismael Basson naye okwa londoda ovalongifi veendjila opo vaha teye eemhango domeendjila ile ngee ove shi ningi otava mangwa po.

“Otu na ovanhu vahapu tava kongwa va mangwe po ndee ohatu ka kala hatu kongo ovanhu ovo. Ohatu pula keshe umwe ina futa okatekete kaye ile ina ya komhangu opo a fute eengunga daye dehandukilo lomeendjila omanga ina ya mefudo,” Basson osho a ti ngaho.

Okwa pula oshiwana opo shi kale sha nuka po kombinga yeameno, shaashi oshitopolwahoololo osha didilika oibofa ihapu yomakengelelo, unene ngaa oumbudi wokuvaka ko oimaliwa yovanhu keengodi.

“Ovanhu nava kwate eengodi davo nawa,” Osho a ti ngaho. Natango, omukulunhu wopolifi koshitopolwa shErongo komufala Nikolaus Kupembona okwa ti opolifi otai lalakanene okwaamena ovanhu, okwaamena omaliko nokuxwepopeka oiponga yomeendjila nosho yo oimbuluma ikwao pefimbo lomatango manene.

Ovanambelewa vomeendjila ova tameka nale oikonga yavo yeameno momafiku 15 Novemba notai twikile fiyo omomafiku 17 Janualia 2025.

Opo kukwashilipalekwe eameno lovalongifi veendjila aveshe, opolifi yaNamibia oya tula ovanambelewa veameno peenhele da fimana mondjila yoB2, mwa kwatelwa yoo nomainda omeendjila peenhle da fimana, osho a ti ngaho.

Ovatalelipo otava pulwa opo va kwashilipaleke kutya ova mona oyeendifo yaamenwa notava londodwa opo vaha shinge nande ve li koshi yodungo ile va ye mohauto nomushingi e li koshi yondungo.

Opolifi oya londoda kombinga yoimbuluma peembanga, nosho yo omakengelelo opamalungula, oumbudi taku longifwa ouyelele uhe shi woshili nosho yo okunyekwa eengodi noundjato vopomake otaku twikile pefimbo lomatango manene.

Ovaningi vomafudo otava pulwa opo va kale va tonata nokutala nawa omidingonoko davo. Naku kotokiwe ngee to nane oshimaliwa ile ngee wa umbata oimaliwa.
Keshe osho tashi ulike shihe li mondjila nashi lopotwe kopolifi i li popepi ile peinda lopolifi lomeendjila.

‘KAPU NA NANDE OKUFILWA ONGHENDA’

Momudo 2022, oshoongalele shouyuki woimbuluma okwa li sha yandja eemwedi nhatu kovanhu ovo va kayaula onyanga meendjila opo va fute oiniwe yovanhu.

Etine, komufala wopolifi inspkta Joseph Shikongo okwa ti ovashingi voihauto ve dulife po300 000 okwa li tava kongwa va mangwe po shaashi ova dopa okufuta outekete vavo pefimbo opo, sho osho nee kwa li kwa ningwa etokolo lokufila ovashingi voihauto onghenda, osho kwa li natango sha wedelwa nokuli.

Okwa yadja omayele kwaavo ve na oiniwe yovanhu yomeendjila inave i futa opo va ye komhangu i na sha noinima yomeendila va ka fute va yande okumangwa po.

Eshi oshe ya nande Shikongo muJuni okwa li a pula ovanambelewa vopolifi opo va londode ovalongifi veendjila ponhele yokufikila ashike va yandja outekete. “Apa wa pumbwa okuyandja elondodo komukwashiwana, mu londoda! Ino yandja ashike ehandukilo komunhu keshe efimbo.

Kashi shi oilonga yetu okuyandja ehandukilo kovanhu. Otu lile po okuyandja omahongo, okuudifa ko ovanhu nokuvahonga kombinga yeeveta domeendjila okupitila moikundaneki ndee haku yandja ashike ehandukilo.

Yandja elondodo. Konima yoikando ivali, to yandje nee nawa ehandukilo,” Osho kwa li a popya ngaho efimbo olo.