Ovo omauyelele avo e livakelwa ove na oumbada

Ovafimanekwa ovo va ningwa oihakanwa yoshiningwanima osho sha ningilwa ehangano loTelecom Namibia (TN) shomauyelele e li vakelwa taa holola omaukwatya ovayakulwa ova ti paife ove na oumbada.

Minista wounamapya nounaimuna, omeva nomatendululo omadu Calle Schlettwein, oo naye omauyelele aye opaumwe a kwatelwa momauyelele oo e li vakelwa okupitila pamalungula oo wa ningilwa ehangano loTN, okwa ti otashi limbililike eshi omauyelele ovanhu a etwa moshiwana.

Omukulunhuwiliki wehangano ledina Namibia Investment Promotion and Development Board Nangula Uaandja okwa ti ouyelele wokulongifa omalungula moNamibia owa kala inau wana, ndee eshi nashi ninge elondodo komahangano aeshe opo e lipake mo meameno lokulongifa omalungula.

“Omanga oshinima eshi shi li oshiningwanima inashi teelelwa, otwe lineekela itashi eta oilanduli ya mana mo kwaavo omauyelele avo e li vakelwa; pamwe otashi yandje omhito yokulihongo noyambuka po.”

Uaandja okwa ti okwe lineekela shinima eshi otashi talika ongomhito yokulipaka mo momilandu odo tadi dulu okukelela oinima ei opo oshinima eshi shiha endululwe vali.

Omupelesidente wongudu yoPopular Democratic Movement (PDM) McHenry Venaani, oo naye omauyelele aye opaumwene kwa li e li vakelwa, okwa ti okwa kala nokupula omapulo kombinga yelongekido laNamibia lomaponokelo omapalungula ashike epangelo ola kala alushe nokupopya kutya otali dulu.

“Epulo limwe olo la pumbwa okupulwa ole li ‘ovayandji vomayakulo ova pumbwa ngaa okukala ve na omauyelele kombinga yovanhu?’ Ohatu tameke okumona oixuna komaponokelo opamalungula ngee ovandji vomayakulo ova kala ve na omauyelele kombinga yetu,” Osho a ti ngaho.

Omunandjungu Michael Amushelelo, oo naye omauyelele aye akwatelwa momauyelele oo e li vakelwa oshivike sha dja ko, okwa ti ota kundafana nahahende waye opo a dule okufutifa ehangano loTN konima eshi ehangano kwa li la ponokelwa kookalyamupombo pamalungula.
Amushelelo natango okwa pula omukulunhuwiliki woTN Stanely Shanapinda opo a fiye po oilonga.

Shalandula oshiningwanima eshi, oumbada oyou kutya omauyelele ovanhu e na ondjokonona yavo yopaunamiti okudja koministli youndjolowele nomayakulo opanghalafano otashi dulika a ka longifwe papuko.

Oumbada watya ngaha natango owa hanga ovanhu vamwe sha landula eshi kwa hololwa kutya oministili yoikwameni, omatembu neameno, oyo i na oshinakuwanifa shokuyandja omikanda kovakwashiwana, nayo otashi dulika ya ninga oshihakanwa shoshiningwanima eshi.

Omahangano akwao a fimana a kwatelwa moshiningwanima eshi shomauyelele e li vakelwa omwa kwatelwa ombelewa yapelesidente, omahangano eedila, omawiliko opaitopolwa needoolopa, oiputudilo yopombada, omahangano oikwamina, omahngano okulandifa oihauto neenhele dokulila.
Minista woundjolowele Kalumbi Shangula okwa indila elididimiko ndee ta ti oministili otai ningi omakonakono omikanda doundjolowele odo de li vakelwa.

“Oshikumungu eshi natango oshi li koshi yomakonakono. Otwa hala okuyandja ouyelele u li mondjila, oo uhe po paife.”

Odjo imwe koTelecom Namibia Omaandaxa oya lombwel oThe Namibian kutya okulivakela meesyestema oku okwa li kwa dimbulukiwa okuuka pexulilo lomwedi wa dja ko, ashike ovanailonga okwa li va lombwelwa kutya okwa li ashike omakufikufi a nghundipala.

Ashike nande ongaho, omukulunhu womavalulo weameno koministili yoikwameni, Rachel Nghiilamo, okwa ti oministili kakwa li nande ya ponkelwa pamalungula ashike omauyelele avo opaumwene nomaukwatya onumba okwa li a monika okupilila okupitila mosystema yaTelecom.

“Oministili yetu kakwa li ya ponikelwa. Eshi kwa li sha ponokelwa oTelcom, ndee tava mono omauyelele etu okupitila mosystema yaTelcom.”

Nghiilamo okwa ti omwaalu wovanhu ovo va kumwa koshinima eshi kau shiivike, nongee momalungula avo okwa li mwe li vakelwa natango opo tashi ya poluheela okupitila momakonakono.

OILANDULI YAKULA

Amushelelo okwa ti omauyelele a fimana paife oku li mokati koshiwana.
“Omuayelele etu oku li moshiwana, ndee taa kale omunbu ta kalele po oshinima eshi.

Ngee to ningi endilo lomayakulo, oho yandje omauyelele opaumwene – omikanda dombaanga – omauyelele oo a pumbwa ashike okukala pokati koye naTelecom, ashike paife oku li moshiwana.

Oshinima eshi oshina oilanduli yakula i dulife pwaai hatu dilaadila,” Amushelelo osho a ti ngaho.

“Otu udite kutya oministili youndjolowele nayo oya ponokelwa pamalungula, ouyelele wovanhu wopaudjolowele wa etwa poluheela.

Ohandi ka shakena noohahende vange omutenya ou opo tu ka faneke eenghatu odo handi kufila TN, ile okumufutifa paveta. Eshi okudanena elineekelo ndee inaku filwa onghenda.

“Telecom okwe tu fufya ndee ta kala te liningifa kutya keshe shimwe oshi li nawa, omanga shihe li nawa.”

Omupedu minista womauyelele nomakwatafano opaungoba Modestus Amutse okwa ti oministili oya mana nonotwaveta yokwaamena omauyelele nosho yo onotwaveta yokukelela oimbuluma yopamalungula, oyo tai ka vatela okuungaunga neameno lopamalungula. Okwa li ta popi noDesert FM Omaandaxa.

“Eshi sha shaala ko paife onghatu ashike ya shikula, oyo yokomitiye yOkabinete yokutula moilonga,” Amutse osho a ti ngaho.

Onotwaveta ei oi lile po okuungaunga nomaponokelo omapamalungula oo taa i pombada nokwaamena omauyelele oshiwana.

Okwa tin gee oministili ya mane okuninga onotwaveta ei nevatelo okundja kovakufimbinga va yooloka, onghatu ya shikula okukundafanwa mOkabinete. Natango Shanapinda okwa ti ehangano inali itavela nande eenghundafana noHunters International, konima kwa li va pewa omafiku axuuninwa va fute omwaalu woshimaliwa shihe shiivike.

“Eshi van inga ove tu dengela, tava ti ova hala okukundafana kutya omwaalu otau kala u fike peni ou tau futwa. Inatu kundafana navo konima twa mona etumwalaka olo. Ihatu kundafana neengangala dokomalungula,” Osho a ti ngaho.

Natango okwa pula yoo vali epangelo opo li tote eeveta da pumbiwa mokukelela oiningwanima yoludi eli.

Omunawino woinima yap amba eameno lopamalungula Nrupesh Soni okwa ti eponokelo laTN lopamalungula nali kale edimbulukifo kovanhu opo vaha kale ashike tava yandje omauyelele avo kukeshe umwe keshe efimbo.

Eshi kwa li ta popi noDesert FM Omaandaxa, okwa pula oshiwana opo shiha yandje omaufemba asho kushe umwe.