Phala Phala: Aafekelwa ya tolokelwa mOshiwambo mompangu

Aafekelwa mboka ya tulwa miipandeko omasiku ga zi ko mekwatathano neyako lyofaalama yomupresitente gwaSouth Africa, Cyril Ramaphosa, oya tolokelwa mOshiwambo pethimbo ya holoka mompangu yamangestrata gwaBela Bela, mEtitano.

Aafekelwa mboka oyo Froliana Joseph (30) mumwayina gwe David Joseph (27), osho wo Imanuwela David (39) notaya tamanekelwa olunyala meyako lyoshimaliwa shooU$580 000 shoka taku hokololwa kwa li sha holekwa momatyofa gofaalama yaRamaphosa yedhina Phala Phala, muFebuluali 2020.

Yalwe mboka taku fekelwa ye na olunyala meyako lyoshimaliwa shoka oyo Petrus Muhekeni, Urbanus Shaumwako, Petrus Afrikaner naErkki Shikongo.

Okupitila momutoloki gwOshiwambo mompangu, Froliana naDavid, oya popi kutya kaye na nande aapambele ye li kondje yaSouth Africa

Ashike nando ongaaka, oshiwike sha zi ko, omupopiliko gwoshikundo shokutula miipandeko mboka taya tamanekelwa iimbuluma moSouth Africa, moLimpopo, Mashudu Malabi-Dzhangi, okwa popi kutya aafekelwa mboka yatatu ya tulwa miipandeko sigo oompaka, oomvalele dhaNamibia ashike oye na wo uukwashigwana waSouth Africa.

Froliana naDavid otaku fekelwa kutya oyo ya wilike ookalyamupombo ya yake oshimaliwa shoka mofaalama, omanga Imanuwela otaku hokololwa oye omudhaninkangala meyako ndyoka.

Froliana naImanuwela otaya tamanekelwa oshipotah sheyako neteyo lyegumbo.

Imanuwela okwa gwedhelwapo oshipotha shuukengeleledhi wopashimaliwa.

Aafekelwa mboka oya holoka mompangu mEtitano okuninga eindilo opo ya pewe oboloha.

Froliana okwa gandja omatompelo kutya okwa hala okumangululwamo mondholongo molwashoka okuna okanona komvula yimwe hoka ke na uunkundi nokapumbwa esiloshimpwiyu nonkene okwi indile a pewe oboloha yooN$2 000.

Onzonkundaneki yedhina TimesLive oya lopota mEtitano kutya omutamaneki gwepangelo Nkhetheni Munyai okwa lombwele ompangu kutya epangelo itali tindi aafekelwa mboka ya pewe oboloha, nokwi indile ya pewe oboloha yi li pokati kooN$5 000 noN$10 000.

Uuyelele kombinga yeyako lyoshimaliwa shaRamaphosa oweya pongalangala muJuni omumvo gwa zi ko sho ngoka a li omukuluntu gwopolisi yomonanguwi, Arthur Fraser a patululile Ramaphosa oshipotha shekwatombambyona osho wo uukengeleledhi wopashimaliwa.

Pethimbo ndyoka, iikundaneki okwa li ya popi kutya Ramaphosa okwa li a futu, David, Joseph osho wo aafekelwa yalwe oshimaliwa shooN$150 000 mu kehe gumwe opo kaaya popye eyako lyoshimaliwa shoka.

Ompangu otayi ka ninga etokolo lyokugandja oboloha momasiku 17 Novemba.