JACQUI Shipanga oku na einekelo kutya ehangano ewiliki lyetanga lyokoompadhi moshilongo, ano o-NFA otali gwedhele okondalaka ye ndjoka yuudheuli wosipana yopashigwana yoomeme yaNamibia yoBrave Gladiators.
Nonando kwali kwa lopotwa kutya Shipanga ota thigi po oshipundi shoka shuudheuli woBrave Gladiators shampa ethigathano lyuudhano woomeme lyotn mobile, Shipanga okwa lombwele oshikondo shomaudhano shoshifo shika kutya ngele okwa pewa okondala ka otaka tsikila nokudheula osipana yopashigwana yoomeme yetanga lyokoompadhi yaNamibia yoBrave Gladiators.
“Okondalaka yandje oyi ile pehulilo muAuguste na inayi gwedhelwa we. Kapu na ngoka tati sha kushoka onkee omuntu oto tameke to ipula kutya ngiika otaya kongo omudheuli gulwe”, Shipanga a ti ngaaka. Okwa ti euvathano lya li olyo ndyoka a dheule osipana molwethigathano ndyoka noku ka kundathanwe nawa nale. Sho a pulwa a komende kushika, omuwiliki gwoshikondo shetanga lyoomeme mo-NFA, mee Jackey Gertze okwa ti Shipanga oku li lela ta humitha komeho lela etanga lyokoompadhi lyoomeme moshilongo noshidhigu okumona we gulwe e na ontseyo mushoka e mu fa. “Sho ndi shi osho owala kutya oye natango omudheuli gwoBrave Gladiators. Oku li oshilyo sha simana shetanga lyokompadhi lyoomeme moNamibia”, mee Gertze a ti ngawo nokugwedha po kutya oonkundathana kombinga yokondalaka ye otadhi ka tameka lela. Mee Gertze okwa ti kakele kokudheula oBrave Gladiators, Jacqui Shipanga otaka pewa wo iinakugwanithwa yilwe yi nasha nehumithokomeho lyetanga lyokoompadhi lyoomeme moshilongo. Jacqui Shipanga osipana yopashigwana yoomeme yetanga lyokoompadhi okwe ye eta lela pamuthika gu li nawa nkene u ulikwa a ninge omudheuli gwayo noya mbekula oyendji methigathano ndyoka lyuudhano woomeme lyotn mobile. Oku uvaneke oBrave Gladiators a hala oku yi tula pamuthika gu li nawa nokwa tegelelwa tayi ka dhana omaudhano gopambili gaali manga omumvo nguka inaagu ya pehulilo. “Aadhanitanga mboka onda kala nayo uule woomvula hamano naheyali lwaampoka ngashingeyi nondi na omukumo kutya osipana ndjika otayi koko nokwaadha omasindana ogendji”, omudheuli gwoBrave Gladiators, Jacqui Shipanga a ti ngaaka.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
