Swapo okwa ti ina nwefwa mo nande koZanu-PF

OMUHOOLOLWA PELESIDENTE Netumbo Nandi-Ndaitwah okwaanya omapopyo kutya Zimbabwe okwa xwaxwameka omahoololo aNamibia.

Oshivike sha dja ko, eengudu dopolitika di li nanho oda lundila ongudu tai pangele yaZimbabwe, yedina Zimbabwe African National Union – Patriots Front (Zanu-PF), kutya oya xwaxwameka omahoololo aNamibia oupelesidente nomutumba wopashiwana oo taa tongwa kutya okwa li a nyika oipa yombwa.

Eengudu ongaashi nee: independent Patriots for Change (IPC), Landless People’s Movement (LPM), Affirmative Repositioning (AR), All People’s Party (APP) noPopular Democratic Movement (PDM).

Eengudu inadi yandja oumbangi welidopemo, ashike keshe imwe oya holola omalimbililo kombinga yendanonghandangala loZanu-PF “lokuvaka” omahoololo moZimbabwe.

Omuleli woLPM Ivan Skrywer okwa ti eembapila odo kwa li da pwa po peenhele domahoololo okwa li omukalo oo kwa li wa longifwa nale kongudu yoZanu-PF i “vake” omahoololo moZimbabwe.

“Ngee otwa tale komahoololo moZimbabwe odula yadja ko, ou oo omukalo kwa li wa longifwa mefiku lotete: Eenhele dokuhoololela kwka li di na eembapila dawana ndee pelesidente Mnangagwa tau wedele omafiku omahoololo nefiku limwe,” Osho a lombwela oikundaneki Olomakaya linya la dile ko.

“Elidopemo laZimbabwe ola kala nokupopiwa momaumbo, meekamba, meebesha – oshi li keshe pamwe komalungula.”

omupopiliko wongudu yoIPC Imms Nashinge okwa ti itashi patanwa kutya Zanu-PF okwa dana onghandangala momahoololo aNamibia.

Nashinge okwa lundila omupopiliko waMnangagwa, George Charamba, kutya okwa li a shiivifa kutya Swapo okwa findana nale omahoololo omanga oidjemo inai dja mo komalungula.

“Ove shi shi ngahelipi? Namibia oshitopolwa shaZimbabwe? Okudja naini Zimbabwe e na ohokwe noikumungu yetu yomoshilongo?”