Okandidate koupelesidente koSwapo netumbo Nandi-Ndaitwah oka ti ongudu otai ka tota eemhito doilonga di dulife petata lomiliyona moule weedula nhano.
Nandi-Ndaitwah, oo a li ta popi pefimbo loshoongalele shoSwapo kEenhana koshitopolwahoololo shaHangwena Olomakaya, okwa holola kutya otaku ka yandjwa eebiliyona N$85 opo kuwanifwe po oshinima eshi.
“Okuhena oilonga movanyasha okwe lipaka mo, neenghono. Sho osho omaudaneko oSwapo a shanga kutya oshimaliwa shi fike peebiliyona N$85 otashi ka yandjwa opo shi vatele okukandula po omukundu ou ndee tashi longifwa mokutota eemhito doilonga dovanyasha,” Nandi-Ndaitwah osho a ti ngaho.
Okwa popya yoo vali kwaavo tava vake oimaliwa yoshiwana opo ve liyambapaleke, unene ngaa oshikumungu shoFishrot.
Okwa pula ovo ve lineekelelwa oinakuwanifa ya fimana noshimaliwa kepangelo opo va longe opo va dule okuyambula po eenghalamwenyo dOvanamibia, ndee tave likaleke kokule nokuvaka, oko haku i eputuko moshipala nohaku twala ovanhu vahapu moluhepo.
“Natu xulife po oinima ei yokupitila momapya, okukonyotolola po oimaliwa ya nuninwa eeproyeka, efupa noulingilingi.
Itatu dulu okukala twa hala okuliyambapaleka mokupitila mokumonifa vakwetu oixuna.
Namibia okwe tu wanena atushe, atushe ohatu wana mo ndee ngee otwa xulifa po oulingilingi keshe umwe ota dulu okukala e na omhito yokumona ko okapambu komboloto. Natu ningeni oinima pouyelele,” Nandi-Ndaitwah osho a pula ngaho.
Okwa ti epangelo loSwapo otali twikile nokutungila kekanghameno liwa olo kwa li la fiwa po kovaleli ovo va dja ko, nokwa twa ovanyasha omukumo opo va tyapule ondjokonona yoshilongo.
“Inatu kaleni twa fya ohoni ondjokonona yetu; otu na ondjokonona iwa yoo kai lengifa. Ngee ku shi ondjokonona yoye ito shiva kutya owa dja peni ile opo wa yuka. Inatu fundjweni kutya ondjokonona yetu inai fimana,” Osho a weda po ngaho.
Okwa ti konima yemanguluko, oshilongo okwa li sha mona omaupyakadi ahapu oshikukuta, efundja, omikifi neliko tali u pedu. Ashike nee, okwa ti, epangelo loSwapo ole shi pondola.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
