AANAMBELEWA aakuluntu muuministeli welongo okwa kundanekwa taya kondjitha opo amushanga guuministeli tuu mboka, omusamane Alfred Ilukena a kuthwe mo manga miilonga.
Otaya kondjitha a ze mo manga miilonga opo ku ningwe omakonakono kutya oshe ende naanaa ngiini a gandja otendela yokugandja iikulya yoomiliyona N$47 kokampani yomukadhi gwe. Omuprimaminista Hage Geingob oshiwike sha zi ko okwa gandjele elombwelo kuminista yelongo, omundohotola David Namwandi opo ku kalekwe manga otendela ndjoka yo yi ka tseyithulululwe nale.
Omukulukadhi gwaIlukena, mee Wendy Mwange Mwiya oye gumwe gwomooyene yokampani yedhina Namibia Cattle Country Food Services ndjoka ya pewa otendela yoomiliyona N$47 okuza mundjoka yoobiliyona N$3 yuuministeli mboka welongo.
Oministeli yelongo, omundohotola David Namwandi ina vula okumonika opo a komende kushoka shaashi ke mo moshilongo omanga omusamane Alfred Ilukena a ti ke shi sha kushoka taku kondjithwa a kuthwe mo manga miilonga. “Shoka onkundana ompe kungame ihe ngele Namwandi osho a tokola po shoka nena nashi kale ngawo.
Ite vulu okukomenda koshinima ndaa na uuyelele musho”, Ilukena a ti ngaaka. Oonzo muuministeli mboka welongo odha ti yamwe po yomaanambelewa aakuluntu moka oya hala okukatukila Ilukena onkatu yasha shaashi shoka a longa kashi na nando uuyuki washa. “Shi li po osho owala kutya na kuthwe manga miilonga opo omakonakona ga ningwe nuupu mushoka”, yimwe yomoonzo osho yi indile ngawo.
Ominista yelongo, omundohotola Namwandi ke na oonkondo paveta okutidha mo manga miilonga naashika oshe ethelwa manga miikaha yahamushanga gwokabinete, omusamane Frans Kapofi. “Osha pumbiwa we tuu tu komende miikundaneki kutya otatu ka ninga po naanaa shike? Oshinima shoka onde shi popya nale sha gwana miikundaneki”, Kapofi a ti ngaaka. Oshifokundaneki shoConfidente osha li she eta puuyelele shoka taku fekelwa omusamane Ilukena a kutha ombinga megandjo lyotendela ndjoka okupitila metokolo ndyoka lya kuthwa oku ya komutumba gwootendela dhepangelo inaashi ziminwa kuminista yelongo, omundohotola, David Namwandi.
Oministeli onkuluntu, Hage Geingob okwa li a yi mo nokugandja elombwelo koministeli yelongo, omundohotola Namwandi a kaleke shoka manga sho kwali kwa lopotwa shoka miikundaneki. Omukadhi gwaIlukena, mee Wendy oku na mo iipambuliko yi thike pooperesenda omilongo ndatu mokampani ndjoka, noye li mo nee naKahungu Ndateelela ngoka e li kaansela melelo lyoshilando shaVenduka, Vatilifa Ndinelago nosho wo nee Lucia Humbu. Sho ehokololo ndyoka lya pitile mo oshiwike sha zi ko, Ilukena okwa li u unganeke oshiithanene niikundaneki moka a li a ti kali e shi shi ngele omukulukadhi gwe oku li omuwiliki gwokampani ndjoka ya adhika ya pewa otendela ndjoka. Ilukena okwa ti omukadhi gwe okwa adhika nale a za mo mokampani ndjoka sho kwa tseyithwa otendela ndjoka.
Okwa li u ulike omukanda ngoka gu ulika kutya omukulukadhi gwe okwa za mo mokampani moka ihe omukanda ngoka u ulike kagu na oshihako.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
