Teckla Lameck nomushungu taa hokololithwa molwooN$19m

OSHILYO oshikulu shokomisi yomayakulo gepangelo, Public Service Commission, Teckla Lameck, pamwe nomushungu Festus Lameck, otashi vulika ya kanithe oofaalama dhawo nomaliko galwe ngele inaa shunitha omamiliyona ngoka ya lile omukuli koBank Windhoek.

Ombaanga oya pula ompangu yi the ko oomiliyona N$10,4 kaahokanathani mbaka osho wo kehangano lyawo lyedhina Naapopje Trading CC.

Iimaliwa mbika oya pulwa ko okupitila momaindilo gatatu ngoka ga falwa kompangu yopombanda moWindhoek kombaanga.

MEtitano lya zi ko, ompangu oye ekelehi eindilo lyombaanga Etine, molwashoka ondjukithi ndjoka yi li momikanda dhoka dha falwa kompangu hayo yi na okulongithwa.

Meindilo ndika, ombaanga otayi pula ompangu yi yi kwathele mokukonga ko oomiliyona N$9,4 kAakwaLameck.

Omishangwa dhompangu odha falwa hoka kwa li haku kala ooLameck koSuiderhoff moWindhoek, nando odha li dhi na okufalwa kofaalama yawo yedhina Wiesental momudhingoloko gwaGrootfontein.

Ombaanga otayi nyenyeta kutya Teckla Lameck nomusamane gwe, pamwe nongeshefa yawo, oye na oongunga dhi thike poomiliyona N$19,7, noya tseyithile ompangu kutya oya hala [ompangu] yi gandje elombwelo opo omaliko ngoka ga landwa nomikuli dhayo ga landithwe po, yi vule okumona mo oshimaliwa shayo.

Omaliko ngoka taga landithwa po oga kwatela mo ofaalama mbali dhomomudhingoloko gwaGrootfontein, Wiesental noKainami, dhi na uunene woohekta 7 664 adhihe kumwe, iikokola itatu yi li momudhingoloko gwaKahandja yuunene woohekta 21 900 lwaampoka, osho wo ehala li li moKlein Windhoek, li na uunene woombinemeta 1 068.

Aahokanathani mbaka inaa holola uulimpinge nomathaneko agehe gane gokupula ompangu yi kwathele mokuthako iimaliwa yombaanga.

Omaindilo ngaka oye ga tumininwe kompangu muKotoba omvula ya zi ko.

Ombaanga oye ya fala kompangu molwomiliyona N$1,5, ndjoka ya pelwe ooLameck muSepetemba 2009, omukuli gwoomiliyona N$6 gwa pelwe aahokanathani muDesemba 2013, oshimaliwa sha pelwe omusamane Lameck kombaanga muApilili 2010, osho wo oshimaliwa sha pelwe Napopje Trading CC muDesemba 2010. Pahokololo lyombaanga, aahokanathani mbaka yaali osho wo ongeshefa yawo, oya tamekele okwaafuta okuza muJuni omvula ya zi ko.

MuKotoba omvula ya zi ko, omusamane Lameck okwa li e na oongunga N$153 188, Naapopje Trading okwa li noongunga dhoomiliyona N$9,3 manga Lameck nomukulukadhi gwe ya li nomukuli gwombaanga gu thike poomiliyona N$2,5 dhomukuli gwomuSepetemba 2009 osho wo oomiliyona N$7,79 dhomukuli ngoka ya pelwe muDesemba 2013.

Sho a pulwa mOsoondaha, uunambo, opo a tye ko sha, Teckla ka li a hala okukomenda, nokwa yamukula ta ti: “Kandi na okomenda.”

Omusamane Lameck naye okwa pulilwe a gandje uuyelele kombinga yoshikumungu shika uunambo, nokwa lombwele onzonkundana ndjika kutya ombaanga oye mu nothela ko kutya oya hala oku mu fala kompangu, ashike ini ithanwa natango kompangu.

Nando ongaaka, Lameck okwa ti ehiyo lyompangu olya tuminwa kondjukitthi yawo onkulu yokoSuiderhoff.

Omusamane Lameck, ngoka a li nale omunashipundi gwewilikongundu lyoTransNamib, okwa ti inaa vula okufuta omikuli dhawo pethimbo muule wethimbo lya piti molwonkalo yeliko lyoshilongo. Nando ongaaka, Lameck okwa ti otaa tula po elandulathano nombaanga opo ya tale nkene taa vulu okufuta oongunga dhawo.

Teckla okwa taalela wo iipotha yilwe. Oku na ongeshefa naKongo Mokaxwa pamwe noshipuna shokoChina, Yan Fang, notaku hokololwa ya kengelela epangelo sho ya landele omashina kehangano lyokoChina mo2009.

Oya tegelelwa ya shune kompangu yopombanda mo14 Mei nuumvo.

Oya hokololithilwe lwotango muApilili 2013, sho yi ikalele ondjo miipotha ayihe mbyoka ya tulilwa mo, noya tulile mo eindilo opo omupanguli ngoka te ya hokololitha i ikuthe mo moshipotha shawo.

Ompangu yopombandeelela moshilongo oya gandjele elombwelo opo iihokolola yawo yi tamukululithwe komupanguli omupe.

Epangelo otali tompo kutya ondando ndjoka lya landa omashina kehangano lyokoChina, Nutech, ndyoka lya li lya kalelwa po kuYang, oya londekwa owina, opo Nutech a vule okudhenga ehangano lyaMokaxwa naLameck, Teko Trading CC, okati koonyala.

Shika osha ningwa nando Teko Trading CC ke na mo sha melanditho ndika. Omashina oga landelwe koomiliyona N$477.

Konima sho oshikondo shiimaliwa sha futu ehangano lyoNutech oomiliyona U$S12,8 muFebuluali 2009, Nutech okwa gandja oomiliyona US$4,2 (konyala oomiliyona N$42 pethimbo ndyoka) kehangano lyoTeko Trading muMaalitsa 2009. Moshimaliwa shoka omwa kuthwa oomiliyona N$9,39 dha pewa Teckla, manga oomiliyona N$8 dha pewa Mokaxwa. Yang okwa pewa oomiliyona N$16,8.

OoLameck, mboka ya hokana eliko li li mumwe, oya landele ofaalama koomiliyona N$3 muMaalitsa 2009.